"Qardaşımın 15 ildir qaz pulu ödəməməsi iddiası yalandır" - Cavanşir Paşazadə

Qafqaz Müsəlmanları İdarəsinin sədri Şeyxülislam Allahşükür Paşazadənin 15 ildir qaz pulu ödəməməsi ilə bağlı mətbuatda informasiyalar yayılıb. Qeyd edək ki, bunu jurnalist Əvəz Zeynallı "Xural TV"nin "Siyasət meydanı" verilişində deyib.

Məsələ ilə bağlı Sonxeber.az-a danışan Qafqaz Müsəlmanları İdarəsinin sədri Şeyxülislam Allahşükür Paşazadənin qardaşı deputat Cavanşir Paşazadə Əvəz Zeynallının iddiasının yalan olduğunu söyləyib:

"Bu, qardaşıma qarşı atılan şər-böhtandan başqa bir şey deyil. Nəinki qardaşım, ümumiyyətlə bizim ailə kommunal borcları zamanında ödəyir. Yalnız qardaşım və bizim ailə üzvləri deyil, hər bir vətəndaş istifadə etdiyi kommunal xidmətlərin borcunu mütləq şəkildə ödəməlidir. Qaldı ki, yayılan bu xəbərə, kimisə belə şərləmək doğru deyil. Düşünürəm ki, bu cür iddialarla qardaşımın nüfuzuna xələl yetirməyə və onu gözdən salmağa çalışırlar. Amma hər kəs qardaşımı yaxşı tanıyır.

Kiminsə haqqında yalan informasiya yayaraq ləkələməyə çalışan insanlar unutmamalıdırlar ki, bu cür addımların qanunla cəzası olmaqla yanaşı, belə əməllər həm də günahdır".

Aysel Yusifqızı

Telegramda izləyin