Novxanı çimərliyində nə baş verir? - Nazirliklərdən AÇIQLAMA

Novxanı çimərliyində nə baş verir? - Nazirliklərdən AÇIQLAMA Novxanı çimərliyində qum yoxa çıxır, dəniz suyu çəkilir, sahili böcəklər basıb.

Bu barədə jurnalist Əzizə İsmayılova öz "Facebook" profilində paylaşım edib.

O bildirib ki, neçə illərdir, xüsusən də yay mövsümündə getdiyi çimərliyi bu il belə vəziyyətdə görmək onu təəssüfləndirib.:

"Neçə illərdir, xüsusən də yay mövsümündə, hər il getdiyim yeganə yer idi bu ərazi. Burda olanlar yaxşı bilir, olmayanlar üçün də dəfələrlə çəkib paylaşmışam. Kasıb insanların dincələ biləcəyi normal bir ərazi idi. Bu gün də getdim. Amma heç bir saat qala bilmədim.

Bu il bu ərazidə nəsə baş verdi. Bir neçə ay əvvəl gedəndə fərqinə varmışdım ki, (arada dənizə tamaşa etməyi sevənəm) sahilin qumu yoxa çıxır. Keçən ilki qum yoxdur. Növbəti dəfə getdiyimdə durum bir az da dərinə işləmişdi. Sahilin qumu yoxa çıxırdı və bu, belə də davam etdi. İndi vəziyyət inanılacaq kimi deyil. Hara yoxa çıxdı qum, niyə belə vəziyyət yarandı? Nə bilən var, nə də maraqlanan.

Dediyim kimi, bu gün getmişdim bir az dəniz sahilində gəzim. Getdim ki, dəniz nə gəzir? Dəniz çevrilib olub böyük bir kanalizasiya quyusu, ya da yuvası. Adını nə istəyirsiniz qoyun.

Hazırda vəziyyət o qədər ürək ağrıdıcıdır ki... Şəkillərə və videolara baxsanız, yəqin ki, təsəvvürünüz yaranacaq. Dəniz bu hissədə də xeyli geri çəkilib, bunu da deyim...

Dənizin bulanıq, bozarmış çirkin sarımtıl rəngli suyu və ətrafdakı üfunət iyi adamın ürəyini bulandırır. Suya yaxın gedən kimi "peyin cücüsü" dediyimiz cücülər daraşır adamın ayağına. Su dediyimin adı sudur. Su bu qədər iyrənc ola bilməz.

Yosunlar, zir-zibil, at peyinləri deyiləsi, təsvirə sığacaq kimi deyil. Üstəlik sahili az qala maşın yoluna çeviriblər...

Əlbəttə ki, Ekologiya və Təbii Sərvətlər Nazirliyinin bu tərəflərə yolu düşmür, xəbərləri yoxdur. Düşsəydi, xəbərləri olsaydı, buna necəsə bir əncam çəkilərdi yəqin ki.

Təəssüf edirəm. Yalnız ona yox ki, göz görə-görə Xəzər məhv olur, həm də ona görə ki, aidiyyəti qurumların heç tükü də tərpənmir və hər gün biraz daha məhv olan Xəzərin dərdi, yuxarıdan kimsəni narahat etmir. Narahat etsəydi, corat sakininin dediyi kimi, Sumqayıtın kanalizasiyası belə asanlıqla, illərlə, dənizə axıdılmazdı və o boyda dəniz çirkab su mənbəyinə çevrilməzdi...

Dəniz onsuz da əlimizdən alınıb. Hasarlayıblar hər yeri. Giriş pulladır çox yerdə. Xəzərin sahili, demək olar, kafe-restoranların ixtiyarına verilib. İnsanların müəyyən qədər rahat nəfəs ala biləcəyi ərazilərdən biri də bura idi, o da belə... Daha burda nə çimmək, nə gəzmək mümkün olacaq.

P.S. Bulvar ərazisində dənizin çəkilməsi haqda bir-iki dəfə kimlərsə yazdı, amma aidiyyəti qurumlardan zərrə qədər reaksiya görmədim. Çətin ki, buna da bir reaksiya ola. Hər halda, bir vətəndaş kimi mən dedim. Görənlər də təsdiq edər hər halda.

Hələ açıqlama veriblər ki, iyunun 15-i çimərlik mövsümü açılır, yoxlayıblarmış və görüblərmiş ki, Novxanı çimərliyi yararlıdır.

Aparıb hamısını tökəsən o suya, deyəsən, "di çim, çimə bilirsənsə..."

Görüntüləri təqdim edirik:

Məsələ ilə bağlı Sonxeber.az saytına Ekologiya və Təbii Sərvətlər Nazirliyinin mətbuat katibi İradə İbrahimova açıqlama verib.

O bildirib ki, Xəzər dənizi təkcə Novxanı deyil, digər ərazilərdə də geri çəkilib:

"Dənizin çəkildiyi üçün dəniz ətrafında yosunların olması təbii haldır. Bu hər zaman olub".

Onu da qeyd edək ki, Sumqayıt şəhər çimərliyinin çimərlik kimi istifadəsinin müvəqqəti olaraq qadağan edilməsi barədə qərar qəbul olunub.

Səhiyyə Nazirliyindən Sonxeber.az saytına verilən məlumata görə, yay mövsümünə hazırlıqla əlaqədar Respublika Gigiyena və Epidemiologiya Mərkəzi Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsi ilə birlikdə Bakı və Sumqayıt şəhərləri ərazisində yerləşən çimərliklərin sanitariya vəziyyətinin müayinəsi və dəniz suyunun keyfiyyət göstəricilərinin laboratoriya tədqiqat üsullarının tətbiqi ilə monitorinq keçirib.

Müayinələrin nəticələrinə görə Mərdəkan, Şüvəlan, Novxanı, Buzovna, Zaqulba, Nardaran çimərliklərində dəniz suyunun fiziki-kimyəvi, bakterioloji göstəricilərinin norma səviyyəsində olduğu aşkarlanıb.

Aparılmış monitorinqlər zamanı Səbail rayonunun Şıx, Qaradağ rayonunun Sahil çimərliklərinin sanitariya-mühafizə zonalarında dənizin tullantı çirkab suları ilə intensiv çirklənmə hallarının hələ də davam etdiyi müəyyən edilib. Nəticədə qeyd olunan çimərliklərin suyunda mikrobioloji çirklənmə göstəriciləri normadan çox olub.

Həmçinin, aparılmış monitorinqlər zamanı Suraxanı rayonu Hövsan, Xəzər rayonunun Türkan çimərliklərinin sanitariya-mühafizə zonalarına buraxılan tullantı çirkab suları ilə çirkləndirilməsi səbəbindən dəniz suyunun mikrobioloji çirklənmə göstəricilərinin mövcud normativlərin tələblərinə cavab vermədiyi müəyyən edilib.

Aparılmış laborator müayinə nəticələrinə əsasən, Pirşağı çimərliyinin suyunun mikrobioloji çirklənmə göstəriciləri də sanitariya norma və qaydalarının tələblərinə cavab verməyib.

Sumqayıt şəhər çimərliyində aparılmış monitorinq zamanı laboratoriya müayinəsinə götürülmüş dəniz suyu nümunələrində mikrobioloji çirklənmə göstəricisi olan bağırsaq çöpləri qrupu bakteriyaların sayı normadan çox olub.

Bu il ərzində çimərlik mövsümündə mövcud vəziyyətin əhalinin sağlamlığı üçün ciddi təhlükə törətdiyini, əhali arasında yoluxucu xəstəliklərin baş verməsi və yayılması təhlükəsini nəzərə alaraq, "Sanitariya-Epidemioloji Salamatlıq haqqında" Azərbaycan Respublikası Qanununa istinadən, Səbail rayonun Şıx, Qaradağ rayonun Sahil, Suraxanı rayonun Hövsan, Xəzər rayonun Türkan, Sabunçu rayonun Pirşağı çimərliklərinin və göstərilən ərazilərdə qeyri-qanuni çimərlik sahələrinin çimərlik kimi istifadəsinin müvəqqəti olaraq qadağan edilməsi barədə Respublika Gigiyena və Epidemiologiya Mərkəzinin müvafiq olaraq qərarları qüvvədə saxlanılıb, həmçinin Sumqayıt şəhər çimərliyinin çimərlik kimi istifadəsinin müvəqqəti olaraq qadağan edilməsi barədə qərar qəbul olunub.

Novxanı çimərliyində nə baş verir? - Nazirliklərdən AÇIQLAMA AYSEL QULİYEVA