"Cənab Prezident İlham Əliyev atasının arzusunu reallaşdıraraq layiqli övlad olduğunu sübut etmiş oldu"

"1993-cü il iyunun 15-də Ulu Öndər Heydər Əliyevin hakimiyyətə qayıdışı ilə Azərbaycan dərin ictimai-siyasi və iqtisadi böhrandan xilas oldu, inkişafın sarsılmaz təməlləri qoyuldu".

Bunu Sonxeber.az-a açıqlamasında "BİG Media" MMC-nin direktoru Emil Əkbərov deyib.

O qeyd edib ki, XX əsrin sonlarında dövlət müstəqilliyini bərpa edən Azərbaycan böyük təhlükələrlə üzləşmişdi:

"O dövrdə hakimiyyətdə olan şəxslərin səriştəsizliyi, dövlət idarəçiliyi sisteminin olmaması, ölkədə fəaliyyət göstərən silahlı dəstələrin 1993-сü ilin əvvəllərindən başlayaraq yol verdikləri başıpozuq əməllər, ölkəmizin ayrı-ayrı bölgələrində separatçılıq və parçalanma meyllərinin baş qaldırması və bütün bunların ölkənin daxilində qardaş qırğını və vətəndaş müharibəsinə zəmin yaratması Azərbaycanı bir dövlət kimi məhv olmaq təhlükəsi ilə üz-üzə qoymuşdu.

AXC-Müsavat cütlüyü yalnız hakimiyyəti saxlamağı düşünərək ölkəmizə faciə gətirmiş, günahsız insanların həlak olmasına şərait yaratmışdı. Dövlət əmlakının talan edilməsi xalqı acınacaqlı duruma salmışdı. Dövlət idarəetməsində heç bir təcrübəsi olmayan şəxslərin vəzifəyə gətirilməsi suverenliyimizə təhdid yaratmışdı. Bütün dövlətlərlə münasibətlər korlanmış, bəzi ölkələrə qarşı iddialar irəli sürməklə Azərbaycanı qonşu ölkələrlə düşmən etmişdi və ölkəni təcrid olunmuş vəziyyətə salmışdı. Belə ki, yalnız özlərinin mənfəətlərini güdən AXC-Müsavat cütlüyünün qısamüddətli hakimiyyəti ölkədə anarxiya, xaosunun tüğyan etməsinə və ölkə iqtisadiyyatının çökməsinə, əhalinin sosial durumunun son dərəcə ağırılaşmasına, torpaqlarımızın işğalı ilə nəticələnmişdi. Bu çətin dövrdə Ulu Öndər Heydər Əliyev xalqının, dövlətinin təhlükəsizliyini özünün və ailəsinin canından üstün tutaraq ölkəyə qayıtdı. Hər kəs yaxşı anlayırdı ki, ölkəni düşdüyü ağır və dözülməz vəziyyətdən çıxarmağa qadir yeganə şəxsiyyət məhz Heydər Əliyevdir. Beləliklə, 1993-cü il iyunun 9-da Ulu Öndər Heydər Əliyev özünün və ailəsinin həyatını təhlükəyə ataraq xalqının çağırışı ilə Bakıya qayıtdı. Onun qayıdışı ölkəmizi Azərbaycan Xalq Cümhuriyyətinin taleyindən daha dəhşətli hadisələrdən və bəlalardan xilas etdi. Ulu öndər Heydər Əliyevin ölkəyə qayıdışı ölkəmizin taleyində dönüş anı oldu".

Emil Əkbərov vurğulayıb ki, 1993-cü il iyunun 15-də Ulu Öndər Heydər Əliyev Azərbaycan Respublikası Ali Sovetinin sədri seçilib:

"1993-cü il iyunun 24-də Milli Şuranın qərarı ilə Azərbaycan Respublikası Prezidentinin səlahiyyətləri Ali Sovetin sədri Heydər Əliyevə verilib. 1997-ci ilin iyun ayında Milli Məclis 15 iyun gününü bayram elan edib.

Ulu Öndər Heydər Əliyevin vətənə qayıdışı Azərbaycanı məhv olmaqdan, parçalanmaqdan xilas etməklə yanaşı həm də ölkədə asayiş və qayda-qanun bərqərar etdi, nizami ordu yaradıldı, Qarabağ müharibəsində atəşkəs əldə edildi, münaqişəsinin dinc yolla nizama salınmasına dair danışıqlara başlandı. İdarəetmə sistemi formalaşdırıldı, insanlara öz dövlətinə inamı qaytarıldı. Neft müqavilələri imzalandı, Azərbaycanın iqtisadi dirçəlişinin əsası qoyuldu. Qanunsuz silahlı qruplaşmaların dövlət çevrilişləri cəhdlərinə son verildi, ilk parlament seçkiləri keçirildi və referendum yolu ilə Konstitusiya qəbul edildi. Azərbaycanın beynəlxalq əlaqələri formalaşdırıldı, ölkənin dünya birliyinə inteqrasiyası prosesi başlandı. Siyasi islahatlara start verildi, çoxpartiyalı sistem yaradıldı".

Emil Əkbərov həmçinin qeyd edib ki, Heydər Əliyevin görmək istədiyi azad, müstəqil, ərazi bütövlüyü təmin olunmuş Azərbaycandır:

"Ulu Öndər Heydər Əliyevin bu arzusunu atasının layiqli davamçısı cənab Prezident İlham Əliyev reallaşdırdı. Belə ki, Ulu Öndərin ordu quruculuğu istiqamətində başladığı işlər və müəyyənləşdirdiyi strategiyanı uğurla davam etdirən Ali Baş Komandan İlham Əliyevin zəhmətləri hesabına bu gün Azərbaycan Silahlı Qüvvələri dünyanın ən güclü 50 ordusu sırasında yer alır, texniki təchizat baxımından bir çox ölkələrin ordularını üstələyir.Ən önəmlisi isə Ali Baş Komandan İlham Əliyevin rəhbərliyi yüksək döyüş qabiliyyətinə və müasir hərbi silah-sursata malik Azərbaycanın Müzəffər Ordusu qısa müddətdə öz gücü hesabına düşməni darmadağın edərək ərazi bütövlüyümüzə nail oldu. Məhz buna görə də təsadüfi deyil ki, Azərbaycanın Vətən müharibəsi, xüsusən misilsiz Şuşa əməliyyatı dünyanın aparıcı ölkələri tərəfindən öyrənilməkdədir.

Tək ordu quruculuğunda deyil, digər sahələrdə Ulu Öndər Heydər Əliyevin siyasi kursunu uğurla davam etdirən cənab Prezident İlham Əliyevin uzaqgörən addımları sayəsində bu gün Azərbaycan dünyanın dinamik inkişaf edən, modernləşən, beynəlxalq miqyasda nüfuzu gündən-günə artan dövlətinə çevrilib.

Vətən müharibəsində qazanılan möhtəşəm Zəfər də bu uğurların məntiqi nəticəsidir. Prezident, Müzəffər Ali Baş Komandan azad edilmiş torpaqlarda infrastruktur layihələrinin təməlini qoyur, Şuşada Novruz tonqalı alovlandırır, Böyük Qayıdışın reallaşdırılması istiqamətində təxirəsalınmaz tədbirlər həyata keçirir. Bu gün hər bir azərbaycanlı əmindir ki cənab Prezident İlham Əliyevin rəhbərliyi ilə ölkəmiz daha qüdrətlənəcək, düşmənin yerlə-yeksan etdiyi Qarabağ dünyanın ən gözəl guşələrindən birinə çevriləcək. Ən önəmlisi cənab Prezident İlham Əliyev atasının arzusunu reallaşdıraraq layiqli övlad olduğunu sübut etmiş oldu".

Aysel Yusifqızı

Telegramda izləyin