"Gələcək nəsillər tarixi yazanları minnətdarlıqla xatırlayacaqlar" - Nəsib Məhəməliyev

Heydər Əliyev: "Azərbaycan-Türkiyə. Bir millət, iki dövlət"

Qazi Mustafa Kamal Atatürk: "Azərbaycanın sevinci bizim sevincimizdir. Kədəri kədərimizdir"

Vətən müharibəsindəki möhtəşəm Qələbədən sonra Azərbaycan tarixinin ən şərəfli, əlamətdar hadisəsi, heç şübhəsiz Şuşa Bəyannaməsinin imzalanması oldu".

Bunu Sonxeber.az-a açıqlamasında deputat Nəsib Məhəməliyev bildirib.

O qeyd edib ki, böyük təntənə ilə 1 illiyini qeyd etdiyimiz Şuşa Bəyannaməsinin mayasında Türk millətinin Ulu Öndərlərinin formalaşdırdığı ideologiya durur. Bu ideologiyanı həyata keçirmək kimi tarixi missiya isə Müasir Türk Dünyasının Liderləri İlham Əliyevlə, Rəcəb Tayyib Ərdoğanın nəsibi oldu:

"Məhz onların timsalında iki qardaş dövlət bir-birinə daha da yaxınlaşdı və gələcək yüz illiklərə hesablanmış strateji əməkdaşlıq ən yüksək səviyyəyə qaldırıldı. Bəyannamənin məhz, mədəniyyət paytaxtımız Şuşada olması və 15 iyun Qurtuluş Günü imzalanması rəmzi məna daşıyır.

Tarix təkrarlanır. Şuşa Bəyannaməsi 100 il əvvəl imzalanmış Qars müqaviləsinin davamı kimi qiymətləndirilir. AtaTürk Türkiyəsi ilə bolşevik Rusiyası arasında bağlanmış Qars müqaviləsi Naxçıvanın, Qarabağın, Zəngəzurun taleyində son dərəcə əhəmiyyətli rol oynamışdır. O zaman da, Cənubi Qafqaz ABŞ, Böyük Britaniya, Rusiya, Fransa, İran kimi böyük dövlətlərin mübarizə mərkəzinə, rəqabət meydanına çevrilmişdi. Analoji proseslər hazırda da müşahidə olunur. O dövrlə müqayisədə, əsas fərq ondadır ki, həmin böyük güclərə qarşısında ləyaqətlə duran, öz milli maraqlarını müdafiə etməyi bacaran, iqtisadi və hərbi baxımdan hər tərəfli inkişaf etmiş güclü Azərbaycan dövləti var. 100 il əvvəl baş verənlər, əsasən Ermənistanın maraqlarına uyğun idisə, indiki proseslər Azərbaycanın mütləq qalibiyyəti deməkdir".

Deputat vurğulayıb ki, Şuşa Bəyannaməsi hər iki ölkənin milli maraqlarının qorunmasında imkanların birləşdirilməsini, beynəlxalq məsələlərdə fəaliyyətlərin əlaqələndirilməsini, yeni regional geosiyasi konfiqurasiyanın qurulmasını, ənənəvi konfiqurasiyanın dağıdılmasını özündə ehtiva edir:

"Hərbi müttəfiqlik, Türkiyə ilə Azərbaycanı birləşdirən Zəngəzur dəhlizinin açılması, nəqliyyat-kommunikasiya əlaqələrinin bərpası, Naxçıvan-Qars dəmir yolunun inşası, iqtisadi-ticari, mədəni, humanitar, gənclər, idman, turizm, informasiya müharibəsi sahəsində birgə əməkdaşlıq nəzərdə tutulur.

Şuşa Bəyannaməsi imzalanması, regionun siyasi mənzərəsinin dəyişməsi ilə nəticələndi. Hər iki qardaş dövlətin gücünə güc qatmış oldu. Türk dünyasının inteqrasiyasını sürətləndirməklə yanaşı, türk düşmənlərinə tutarlı cavab verildi. Cəmi bir neçə il bundan öncə, bütün bu gerçəklikləri düşünmək belə mümkünsüz görünürdü. Olduqca mürəkkəb geosiyasi şərtlərin, təzyiqlərin olmasına rəğmən, Şuşa Bəyannaməsi günümüzün reallığıdır. Bu reallığın əsas müəllifi isə, çətin şəraitdə tarixi məsuliyyəti üzərinə götürməklə, taleyüklü qərarları qəbul edən Azərbaycan Prezidenti İlham Əliyevdir. Gələcək nəsillər, Şuşa Bəyannaməsini Azərbaycan tarixinin ən şərəfli hadisələrindən biri kimi qeyd edəcək və tarixi yazanları minnətdarlıqla xatırlayacaqlar".

Aysel Yusifqızı

Telegramda izləyin