Turla səyahət etmək istəyənlərin nəzərinə - AGENTLİKDƏN AÇIQLAMA

Yay mövsümündə Bakıda dincələnlərdən əlavə rayonlara üz tutanlarda az deyil. Kimiləri bölgələrə, kimiləri xarici ölkələrə gedir. Tur şirkətlərinə müraciət edənləri sayı günbəgün çoxalır. Bəs şirkətlər daxili və xarici turları təşkil edərkən və ya sərnişin daşınma zamanı nə qədər diqqətlidir ?

Mövzu ilə bağlı Sonxeber.az saytına Turizm Agentliyinin yeni mətbuat katibi Gülnar Mustafayeva açıqlama verib.

O bildirib ki, turizm şirkətlərinin fəaliyyət göstərməsi üçün tələb olunan lisenziya 2015-ci ildə ləğv olunub:

"Həmin vaxtdan bu günə qədər turizm şirkətləri hər hansı lisenziya olmadan sərbəst şəkildə fəaliyyət göstərirlər. Sadəcə vergi orqanlarından qeydiyyatdan keçərək VÖEN alıb işləyə bilərlər. Sərnişin daşınma ilə bağlı olaraq sığorta məsələsi də ön plandadır.

Tur zamanı turistlərin həyat və sağlamlığına zərər dəyməsinə səbəb olan hadisələrin baş verdiyi hallarda tur xidməti təşkilatçılarının və avtonəqliyyat vasitəsi sahiblərinin məsuliyyətinin əhatə dairəsi dəqiq müəyyən edilməlidir. Belə ki, "Turizm haqqında" Qanunun 16.5.2-ci maddəsinə əsasən, turoperator və turagentlərin turistlərə təxirəsalınmaz yardım göstərilməsini təşkil etmək öhdəliyi vardır.

Eyni zamanda, yol-nəqliyyat hadisələri bilavasitə sərnişindaşıma fəaliyyətinin həyata keçirilməsi ilə əlaqədar olduğundan, sərnişinlərə dəyən zərərin ödənilməsi avtonəqliyyat vasitəsi sahiblərinin mülki məsuliyyətinin icbari sığortası əsasında həyata keçirilir.

Bundan əlavə, tur xidməti təşkil edən şəxslərə turistlərin təhlükəsizliyinin təmin edilməsi məqsədi ilə müvafiq olaraq hər bir turistə məxsus könüllü qaydada səfər sığortasının təşkil edilməsi tövsiyə edilir".

AYSEL QULİYEVA

Telegramda izləyin