"Müharibə veteranı" təqaüdü 100 manata qaldırıla bilərmi? - AÇIQLAMA

"Müharibə veteranı" təqaüdünün artırılması təklif olunur. Hətta, bu gün əmək və əhalinin sosial müdafiə nazirinin müavini Anar Əliyev 2023-cü ilin yekunlarına dair keçirilən mətbuat konfransında bildirib ki, Vətən müharibəsi iştirakçılarına ödənilən vəsaitin artırılması məsələsinə yenidən baxıla bilər.

Bununla bağlı Sonxeber.az-a danışan deputat İqbal Məmmədov bildirib ki, Müzəffər Ali Baş Komandan İlham Əliyevin rəhbərliyi ilə Azərbaycanın Müzəffər Ordusu ərazi bütövlüyümüzü bərpa edərək bizi Qarabağımıza qovuşdurdu:

"Təəssüf ki, müharibə itkisiz olmur. Biz də Vətən müharibəsində şəhidlər verdik, cəbhədə döyüşən gənclərimiz arasında yaralanaraq qazi adını qazananlar da oldu. Bu gün şəhid ailələrinə və qazilərə, eyni zamanda, müharibə veteranlarına dövlətin göstərdiyi qayğı yüksək səviyyədədir. Cənab prezident İlham Əliyev daim şəhid ailələrinə və Qarabağ müharibəsi əlillərinə yüksək qayğı ilə yanaşıb. Ölkə başçısı bütün dövlət qurumları qarşısında bu həssas təbəqəyə aid olan insanların problemlərinin həllini bir nömrəli vəzifə kimi müəyyən edib. Bu gün dövlətimiz tərəfindən şəhid ailələrinin və müharibə əlillərinin mənzil-məişət şəraitinin yaxşılaşdırılması, onlara fərdi evlərin, mənzillərin verilməsi və digər bir sıra istiqamətlərdə çox mühüm addımlar atılmaqdadır. Eyni zamanda qazilərin sağlamlığının qorunması, bərpası, onların müasir protezlərlə təminatı, reabilitasiya kurslarını keçməsi, müalicə müəssisələrində müalicəsi üçün də çox mühüm işlər görülür. Cənab prezident İlham Əliyevin bu istiqamətdə imzaladığı müvafiq Fərman və sərəncamlar qazi və şəhid ailələrinin sosial müdafiəsinin gücləndirilməsinə müstəsna töhfələr verməkdədir".

Deputat vurğulayıb ki, müharibə əlilləri, veteranları və şəhid ailələrinin sosial ehtiyaclarının dövlət tərəfindən ödənilməsi çox müsbət haldır:

"Qaldı ki, "Müharibə veteranı" təqaüdünün artırılması məsələsinə yenidən baxıla bilər".

Telegramda izləyin