"Ümid edirəm ki, nə vaxtsa Ermənistan özündə güc tapıb vasitəçi ölkə olmadan danışıqlara gedəcək" - Səxavət Məmməd

Bu gün müzakirə olunan məsələlərdən biri də Azərbacan-Ermənistan arasında vasitəçi ölkə olmadan sülh danışıqlarının aparılmasıdır.

Bununla bağlı Sonxeber.az-a danışan siyasi-ekspert Səxavət Məmməd bildirib ki, Azərbaycanla Ermənistan arasında vasitəsiz danışıqlar məsələsi hazıda gündəmdədir:

"Xüsusilə də, rəsmi Bakı bunu tez-tez dilə gətirir. Ermənistan isə bizdən fərqli olaraq çalışır ki, başqa dövlətləri vasitəçi kimi əlavə etsinlər. Azərbaycan tərəfi özünə güvəndiyi üçün istəyir ki, danışıqlar vasitəçi olmadan aparılsın. Rəsmi Bakının səsləndirdiyi fikirlər də aydındır. Azərbaycan tərəfi bildirir ki, danışıqlarda vasitəçi ölkələr olarsa onların da hansısa tələbləri olacaq. Azərbaycan tərəfi danışıqları vasitəçi ölkə olmadan aparmaq istəyir. Azərbaycanla Ermənistan arasında böyük fərqlər var. O fərqlərdən ən başlıcası isə manevr eləmək qabiliyyətidir. Azərbaycanın manevr eləmək qabiliyyəti olduqca yüksəkdir. İstər enerji daşıyıcıları ilə bağladığı müqavilələr, istərsə də qərb ölkələri ilə ticarət əlaqələri. Bütün bunlar çox yüksək səviyyədədir. Ermənistanda isə bu belə deyil. Azərbaycan eyni anda həm Ukraynaya humanitar yardım göndərir, həm də Rusiya ilə çox yaxşı münasibətlər qura bilir. Amma bunu Ermənistan bacara bilmir. Çünki Ermənistan Ukraynaya humanitar yardım göndərərsə gərək Rusiyadan uzaqlaşa. Rusiyanın yanında olacaqsa da gərək qərbin layihələrinə və fikirlərinə əks olmalıdır. Amma Azərbaycan bunu bacarır. Nəzərə almaq lazımdır ki, Ermənistan ərazisində Rusiyanın üç hərbi bazası var. Bundan əlavə Ermənistanın Avropa İttifaqının humanitar missiyası var. Ermənistan daha çox da Fransaya bağlıdır".

Səxavət Məmməd söyləyib ki, Ermənistandan fərqli olaraq bu gün Azərbaycan müstəqil siyasət yürüdür:

"Özü istədiyi qərarı verə bilir. Ermənistanın isə bu məsələlərlə bağlı müstəqil fikir bildirə bilməsi məsələsi sual altındadır. Hesab edirəm ki, Azərbaycan tərəfindən Rusiyasız, ümumiyyətlə qərbin iştirakı olmadan danışıqlar mümkündür. Ermənistandan tərəfindən isə bu mümkünsüzdür. Ermənistanın zəyif olması,ərazisində başqa dövlətin hərbi bazasının olması, benəlxalq təşkilatlardan və bəzi ölkələrdən asılı olması vasitəsiz danışıqlardan uzaqlaşdırır. Hesab edirəm ki, bu gün Azərbaycanla Ermənistan eyni səviyyədə olsaydı vasitəçi ölkə olmadan danışıqların aparılması mümkün olardı. Amma indiki vaxtda Rusiya da olmasa, başqa ölkənin iştirakı ilə Ermənistan danışıqlara gedəcəyi məlumdur. Ümid edirəm ki, nə vaxtsa Ermənistan özündə güc tapıb vasitəçi ölkə olmadan danışıqlara gedəcək. Nədənsə, bu inandırıcı gəlmir. Çünki bu gün Cənubi Qafqaz uğrunda açıq savaş gedir. Bu savaşın tərəfləri Cənubi Qafqaz ölkələrinə təsir etməyə çalışır. Cənubi Qafqazı rahat buraxmaq istəmirlər. Biz gələcəkdə görəcəyik ki, danışıqlar yenidən uzadılır. Azərbaycan tərəfdən hər şey rahatdır. Amma Ermənistan öz problemlərini həll etməsə vasitəçi ölkə olmadan danışıqların aparılması mümkün olmayacaq".

Sevda Səfərova

Telegramda izləyin