Sosial şəbəkələrdə yeməklə bağlı paylaşımlara baxmaq ziyandır

İnternetdə qeyri-sağlam qidaların şəkillərinə baxmaq iştahanı artıra və qida pozğunluqlarına səbəb ola bilər.

Bu barədə Livan Amerika Universitetinin alimləri araşdırma aparıblar.

Məlumata görə, tədqiqatda 18-24 yaş arası 63 nəfər iştirak edib. 15 dəqiqə ərzində iştirakçıların yarısı sosial şəbəkədə yeməklərin (əsasən fast food) şəkillərinə, qalan könüllülər təbiətin, binaların və müxtəlif heyvanların təsvirlərinə baxıblar. Bu mərhələni başa vurduqdan sonra iştirakçılardan əhval-ruhiyyələrini bildirmələri və aclıqlarının şiddətini qiymətləndirmələri istənilib.

Yemək fotolarına baxan könüllülər neytral fotolar qrupundakılara nisbətən daha çox aclıq hiss etdiklərini bildiriblər. Virtual nahar üçün məhsul seçimi ilə bağlı eksperimentin sonrakı mərhələsində onlar daha çox pizza, kartof qızartması və burgerləri seçiblər.

Bir həftə sonra tədqiqatın təşkilatçıları qrupları dəyişərək təcrübəni təkrarladılar. Əvvəllər yemək şəkillərinə baxan iştirakçılardan sosial şəbəkədə neytral fotoşəkillər (təbiət, heyvanlar, memarlıq) olan lenti vərəqləmək istənilib. Ayrılmış 15 dəqiqəlik baxışı tamamladıqdan sonra könüllülər virtual nahar hazırlayarkən daha çox salatlara və quş ətinə üstünlük veriblər.

Tədqiqatçılar qeyd ediblər ki, yemək şəkillərinə baxmaq insanın nə qədər tox olmasından asılı olmayaraq aclıq səviyyəsini artıra bilər. Bu, vizual aclıq adlanır. Alimlər əlavə edib ki, qeyri-sağlam qida ilə bağlı sosial media məzmununa məruz qalma əhval-ruhiyyəyə mənfi təsir edir və yağlı və yüksək kalorili qidalara həvəsi artırır. Bu, qeyri-sağlam yemək davranışına səbəb ola bilir./oxu.az

Telegramda izləyin