Bitki çayları haqqında vacib məsləhətlər: Bəziləri dəmlənməli, digərləri qaynadılmalıdır - SİYAHI

Bitki çayları bir çox faydalı xüsusiyyətlərə malikdir, xüsusilə həzm problemlərini yüngülləşdirməkdə effektiv rol oynayır. Ancaq bu məhsuldan istifadə edərkən düzgün növləri seçilməli, uyğun şəkildə dəmlənməli və nəzarətli istehlak olunmalıdır.

Oxu.Az-ın "Haber Global"a istinadla verdiyi məlumata görə, bu barədə türkiyəli qastroenteroloq və fitoterapiya üzrə mütəxəssis Bülent Yaşar xəbərdarlıq edib.

O, bitki çaylarının həm bəzi xəstəlik əlamətlərini yüngülləşdirdiyini, həm də gündəlik sağlamlıq rejiminə müsbət təsir göstərdiyini deyib.

"Həzm sistemi narahatlıqlarının müalicəsində çobanyastığı, nanə və ballınanə (melisa) çayları önə çıxır. Bu çaylarla yanaşı, adaçayı, zəncəfil, cirə və razyana kimi bitkilər də həzmin asanlaşdırılmasına töhfə verir", - deyə o bildirib.

Mütəxəssis bitki çaylarının hazırlanmasında dəmləmə və qaynatma kimi iki əsas üsulun olduğunu qeyd edib:

"Əsasən yarpaq və çiçək hissəsi istifadə olunan bitkilər qaynadıldıqdan sonra soyudulmuş suya əlavə edilərək dəmlənməlidir. Zəncəfil kimi kök bitkilər əvvəlcə su ilə birlikdə qaynadılmalı, sonra süzülərək istehlak edilməlidir".

Onun sözlərinə görə, bitki çaylarını gün ərzində 1-3 stəkan içmək idealdır.

"Daha çox istehlak bitki tərkiblərinə görə orqanizmdə yan təsirlərə səbəb ola bilər", - deyə mütəxəssis vurğulayıb.

O, xüsusilə çobanyastığı çayında diqqət edilməli fərqli növlərin olduğunu vurğulayıb:

"Xalq arasında may çobanyastığı kimi tanınan növü tövsiyə edirik. Təbiətdəki hər çobanyastığı çay kimi istehlak edilə bilməz; yanlış növ istifadəsi allergik reaksiyalara səbəb ola bilər", - deyə o bildirib.

Mütəxəssis bitki çaylarının etibarlı mənbələrdən alınmasının vacib olduğunu qeyd edib.

"İstehlakçılara bitki çaylarını əldə edərkən mənbəyinə diqqət yetirmələrini və mütəxəssis məsləhəti ilə istifadə edilməsini tövsiyə edirik", - deyə o vurğulayıb.

Telegramda izləyin