"Emosiyalarını kontrolda saxlaya bilməyən insan, sağlam insan hesab olunmur" - Samirə Bağırova

Günümüzdə 5 insandan 4-nün əsəb xəstəsi olduğunu görə bilirik. Hətta ən sadə məsələlərdə belə əsəbləşib özlərindən çıxa bilən insanlar var. Bu hal niyə yaranır və belə insanlara hansı müalicə üsulu vacibdir? Bəzən belə fikir də səsləndirirlər ki, əsəbləşdikdə onu səsli şəkildə, bağıraraq bildirmək insana yaxşı gəlir. Bu fikrin doğruluq dərəcəsi nə qədərdir?

Mövzu ilə bağlı Sonxeber.az-a psixoloq Samirə Bağırova danışıb.

O, açıqlamasında qeyd edib ki, bağırma terapiyası mövcuddur və bu yol neqativ emosiyalardan qurtulmaq üçün lazımlı yoldur:

"Doğrudur. Günümüzdə əsəb, stress yaradan vəziyyətlər artmaqdadır. Buna ilk səbəb elə gündəlik həyat içində qayğılarımızdır. Maşınların artması ilə əlaqədar, tıxacların çoxalması, yersiz siqnal səsləri, xam sürücülər, marketlərdə növbə mədəniyyətinin olmaması, götürülən ərzaq arabalarını kassanın önündə qoyub gedərək, növbəti insana qarşı mədəniyyətsizliyin nümayişi, bəzi hallarda maddi çətinliklər, iş həyatında anlaşılmazlıqlar, övladla bağlı problemlər, şəxsi həyat problemləri, bəzən xəstəliklər və sairə saymaqla bitməyən və şüur atında xırda- xırda yığılıb sonda emosional partlayışa səbəb olan hallar artdıqca artır. Ən sadə məsələ dediyiniz əslində illərlə yığılıb, ən sadə məsələdə əsəb partlayışı keçirməkdir. Mən deyərdim ki, müsir həyatımızda ən çox əsəb yaradan hal, insanların mədəniyyətsizliyinin artmasıdır. Ən adi etik qaydalara əməl etməyi bacarmadıqca, tərbiyəsizlik nümayiş etdirmiş olurlar ki, ən böyük qıcığa səbəb olur. Mədəniyyəti isə ən azından təhsil təbliğ etdirməlidir. Əsəbiləşib birinə bağırmaq özü də tərbiyəsizlikdir. Emosiyalarını kontrolda saxlaya bilməyən insan sağlam insan hesab olunmur. Belə ki, xarakterində sərhədləri yoxdur ki, emosiyalarının əzilməsinə şərait yaradıb və duyğuları bağırmaq dərəcəsinə gəlməsini göstərir. Normalda isə bağırma terapiyası mövcuddur. Hətta xarici ölkələrin bəzi şirkətlərində bağırma balkonu mövcuddur. İnsanlar bir- birinə, yaxud çətin müştəriyə səs tonunu qaldırmaması üçün, balkonda çıxıb rahat bağıra bilər. Bu uzun illərin psixoloji bağırma metodudur. Dənizdə, açıqlıqda, maşında, balkonda, küləkdə ürəkdən bağırmaq, qışqırıb ağlamaq həqiqətən insanda rahatlıq və yenilənmə yaradır. Neqativ emosiyaları mütləq çıxarmaq vacibdir ki, yeni müsbət emosiyalar ilə əvəz olunsun. Neqativi vücuddan çıxarmadıqca psixosematikaya, psixi pozuntulara və digər xəstəliklərə yol açmış olur".

Vüsalə İbrahimli

Telegramda izləyin