Göz bəbəyində dəyişiklik və dırnağın qalınlaşması nəyin siqnalıdır?

"Gözün bəbəyi ətrafında boz halqanın görünməsi və dırnaqların qalınlaşması ürək xəstəliklərinin siqnalı ola bilər".

Oxu.Az-ın "Daily Mail" nəşrinə istinadla verdiyi məlumata görə, bu barədə britaniyalı terapevt Bhavini Şah xəbərdarlıq edib.

Həkimin sözlərinə görə, ürək xəstəliklərinin məlum əlamətləri, məsələn, sinədə ağrı və sıxılma hissi, nizamsız ürək ritmi və yorğunluq haqqında insanların çoxu məlumatlıdır.

"Bununla belə, tez-tez diqqətdən kənarda qalan gizli simptomlar da mövcuddur. Xüsusilə qəribə əlamətlərdən biri dırnaqların qalınlaşması və genişlənməsidir. Bu, ürək-damar sisteminin oksigenlə zəngin qanı barmaqlara effektiv şəkildə yönəldə bilməməsi səbəbindən dırnaq toxumasının böyüməsini sürətləndirən maddənin həddindən artıq istehsalına görədir", - deyə həkim bildirib.

Bhavini Şahın dediyinə görə, bəbəyin ətrafında boz halqanın yaranması ürəyin işemik xəstəliyinə işarə edə bilər.

"Araşdırmalar göstərir ki, 40 yaşdan yuxarı insanların təxminən 45%-ində bəbək ətrafında belə bir "çərçivə" var. Həmçinin, bu hal 60 yaşlı insanların təxminən 70%-ində müşahidə olunur", - deyə terapevt əlavə edib.

Mütəxəssis izah edib ki, bəbəyin ətrafındakı boz halqa yüksək xolesterin səviyyəsindən xəbər verə bilər.

"Koronar arteriyalardakı qan axınının pozulması ürək əzələsinin zədələnməsinə səbəb ola bilər ki, bu da ürəyin işemik xəstəliyi ilə xarakterizə olunur", - deyə həkim sözlərini yekunlaşdırıb.

Telegramda izləyin