Qadınların ürək döyüntüləri kişilərdən niyə daha sürətli olur?

Onilliklərdir həkimlər və tədqiqatçılar ürək ritmi ilə bağlı əsas sirrə cavab axtarırlar: nə üçün qadınlarda adətən ürək döyüntüləri daha sürətli olur, halbuki kişilərdə daha çox ürək ritminin pozulması — məsələn, qulaqcıq fibrillyasiyası (atrial fibrilasiya) müşahidə olunur?

Ölkə.az xəbər verir ki, Ohayo Ştat Universitetinin Veksner Tibb Mərkəzində aparılan yeni bir araşdırma bu suala müəyyən aydınlıq gətirib. Araşdırma göstərir ki, ürəyin hər normal döyüntüsünü başladan və onun təbii "ritm generatoru" olan kiçik, lakin güclü bir quruluş — sinoatriyal düyün (SAN) — qadınlar və kişilərdə fərqli genetik mexanizmlərlə işləyir.

Tədqiqatın nəticələrinə əsasən, qadınlarda ürək döyüntüsünü sürətləndirən genlər aktivdir. Kişilərdə isə əksinə qulaqcıq fibrilasiyası kimi ürək ritmi pozuntularına səbəb ola biləcək gen şəbəkələri daha fəaldır.

Alimlər donor insan ürəklərini araşdıraraq sinoatriyal düyünün hüceyrələrində ürək ritmini formalaşdıran və qoruyub saxlayan gen dəstlərini müəyyənləşdiriblər.

Onlar stimullaşdırma, maddələr mübadiləsi, iltihab və fibroz yenidən qurulma proseslərində iştirak edən genləri və yolları analiz edib, bu proseslərin bioloji cinsə görə fərqli şəkildə baş verdiyini müşahidə ediblər.

Tədqiqatın həmmüəllifi, Ohayo Ştat Universitetinin dosenti və tibb elmləri doktoru Nin Li bildirib ki, qadınlarda ürək ritmini sürətləndirən iki əsas gen — TBX3 və HCN1 daha yüksək səviyyədə aktiv idi. Kişilərin ürəyində isə, əksinə, iltihabla və kollagen istehsalı ilə bağlı gen şəbəkələrinin daha aktiv olduğu müşahidə olundu. Bu da ürəkdə elektrik siqnallarına təsir edərək aritmiya riskini artıra bilər.

Alimlərin sözlərinə görə, bu nəticələr gələcəkdə hər bir pasiyentin fərdi xüsusiyyətlərini nəzərə alan, daha fərdiləşdirilmiş ürək ritmi müalicə üsullarının inkişafına zəmin yarada bilər.

Telegramda izləyin