Müavinət və təqaüdlər nə vaxtdan artırılacaq? - AÇIQLAMA

Bir sıra təqaüt və müavinətlərin artırılması gözlənilir. Belə ki, Prezident İlham Əliyevin ötən il imzaladığı əhalinin sosial rifahının yaxşılaşdırılması sahəsində tədbirlərin davam etdirilməsi haqqında sərəncamda nazirlər kabinetinə sosial müavinətlərin və təqaütlərin məbləğinin artırılması ilə bağlı təkliflərin 3 ay müddətinə hazırlanıb təqdim edilməsi tapşırılmışdır. Bu müddət mart ayının 23-də başa çatıb. Bəs, bu artımların nə vaxt həyata keçiriləcəyi və təxmini nə qədər artacaq? Dövlət büdcəsinin imkanları və ümumi iqtisadi vəziyyət nəzərə alınaraq, bu artımların yaxın zamanlarda baş verməsi nə dərəcədə realdır?

Mövzu ilə bağlı Sonxeber.az-a iqtisadçı ekspert Toğrul Vəliyev danışıb.

O, açıqlamasında qeyd edib ki, sərəncamın imzalanması və onun yerinə yetirilməsi arasında olan müddətə gəldikdə, qeyd olunan 3 ay rəsmi olaraq daha çox müvafiq planların hazırlanması üçün nəzərdə tutulub:

"Onun reallaşması bir sıra digər amillərdən asılıdır. Adətən bizdə müvafiq dəyişikliklərin irəli sürülməsi üçün dövlət büdcəsində dəyişiklik edilməlidir (əvvəlcədən müvafiq xərclər ya nəzərdə tutulmur, ya da maliyyələşmə mənbəyi müəyyən edilmir). Bununla belə, hər il yay aylarında dövlət büdcəsinə dəyişikliklər edilir. Təxmin edə bilərik ki, məhz bu yaxınlarda dövlət büdcəsində dəyişiklik ediləcək və ondan sonra (iyul-avqust aylarında) müvafiq artım haqqında qərar veriləcək (ehtimal etmək olar ki, sentyabr ayına da təyin oluna bilər). Düzdür, bəzən müvafiq qərar verilir və yalnız sonradan dövlət büdcəsinə dəyişiklik edilir.

Artımın nə qədər olacağına gəldikdə isə bunu demək çətindir, demək olar ki, mümkün deyil. Bu işdə bizdə hər hansı sistemli yanaşma yoxdur. Yəni müvafiq qərar hökumətin "ehtiyac" hiss etdiyi dövrdə verilir. Reallıqda sosial müavinətlər və təqaüdlər müəyyən mexanizm ilə tənzimlənməlidir. Ən yaxşısı buna dair müvafiq qanunun olması olardı və bu qanuna görə müəyyən dövrlərdə (altı ay və ya bir il) sosial ödənişlərin həcmi indeksləşdirilərdi. Təəssüf ki, bizdə belə bir mexanizm yoxdur və nəticədə biz nə artımın vaxtı (sosial müavinətlərə aid olan), nə də həcmi haqqında dəqiq ehtimallar irəli sürə bilmirik".

Vüsalə İbrahimli

Telegramda izləyin