Mikroplastiklər içkilərdə gizli təhlükə? Şüşə qablar üstünlükdür, amma...

Fransa Qida Təhlükəsizliyi Agentliyinin apardığı araşdırmaya görə, şüşə qablar ilə müqayisədə, plastik və ya dəmir qablarda saxlanılan su, soda, pivə və şərab kimi içkilərdə mikroplastik hissəciklərin səviyyəsi xeyli yüksəkdir.

Milli.Az "Agence France-Presse"ə istinadən xəbər verir ki, alimlər Fransada geniş yayılmış məşhur içkiləri təhlil ediblər.

Araşdırma direktoru Qiyom Dyuflo bildirib ki, məqsəd qablaşdırma növünün mikroplastik səviyyəsinə təsirini müəyyən etmək olub. Nəticələr göstərir ki, şüşə butulkalarda orta hesabla hər litr içkidə təxminən 100 mikroplastik hissəcik mövcuddur.

Araşdırma iştirakçısı aspirant İselin Şaib isə bildirib ki, nəticələr gözləniləndən fərqlidir. Onun sözlərinə görə, mikroplastik hissəciklərin çoxu şüşə qabların qapaqlarının kənarındakı boya materiallarından əmələ gəlir. Güman edilir ki, saxlama zamanı qapaqların bir-birinə sürtülməsi nəticəsində görünməz mikrocızıq və mikroplastiklər sərbəst buraxılır.

İçməli suda mikroplastik səviyyəsi isə bütün qab növlərində nisbətən aşağı olub: şüşə butulkalarda litrdə 4,5, plastik qablarda isə 1,6 hissəcik müşahidə edilib. Şərabda isə, hətta şüşə qabda belə, minimal səviyyələr qeydə alınıb. Bunun səbəbləri hələ tam aydın deyil.

Qazlı su və pivə kimi içkilərdə isə mikroplastik səviyyəsi daha yüksək olub - litrdə 30-60 hissəcik arasında dəyişir. Bununla belə, alimlər bildirir ki, bu mikroplastik səviyyələrinin insan sağlamlığı üçün təhlükəli olduğunu demək üçün hələ kifayət qədər dəlil yoxdur, çünki mikroplastiklərin toksiklik həddi müəyyən edilməyib.

Agentlik istehsalçılara tövsiyə edir ki, qabların qapaqları daha effektiv təmizlənsin: hava ilə üfürmə, ardınca su və spirtlə yuyulma çirklənməni 60 faizədək azalda bilər.

Telegramda izləyin