Tanınmış iş adamı həlak oldu, həyat yoldaşı ağır yaralandı

Balıkesirin Ayvalık rayonunda baş verən yol-nəqliyyat hadisəsi faciə ilə nəticələnib.

Sonxeber.az türk mediasına istinadən xəbər verir ki, avtomobilin divara çırpılaraq aşması nəticəsində zeytinyağı ticarəti ilə məşğul olan iş adamı Murat Ustalı (36) hadisə yerində həyatını itirib, həyat yoldaşı Naz Ustalı (33) isə ağır yaralanıb.

Qəza iyunun 23-nə keçən gecə saat 01:30 radələrində Ayvalıkın Cunda adasında yerləşən Mithatpaşa məhəlləsinin 15 Sentyabr küçəsində baş verib. Sürücüsü hələ müəyyən olunmayan nəqliyyat vasitəsi idarəetməni itirərək əvvəlcə bir evin, ardınca isə başqa bir binanın divarına çırpılıb aşıb.

Əraziyə dərhal yanğınsöndürmə, təcili tibbi yardım və polis qrupları cəlb olunub. Avtomobildə sıxışıb qalan Murat Ustalı yanğınsöndürənlər tərəfindən çıxarılsa da, həyatını xilas etmək mümkün olmayıb.

Ağır yaralanan Naz Ustalı əvvəlcə Ayvalık Dövlət Xəstəxanasına, daha sonra isə Balıkesir Atatürk Şəhər Xəstəxanasına aparılıb. Onun vəziyyətinin ağır olduğu bildirilir.

Hadisə ilə bağlı araşdırma aparılır.

Telegramda izləyin