Qulağınızdakı bu əlamət beyninizə qədər yayıla bilər - XƏBƏRDARLIQ

Əgər qulağınızdan zaman-zaman çirk gəlirsə, bunu "soyuqdəymədir" və ya "keçəcək" deyib laqeyd yanaşmayın. Mütəxəssislər xəbərdarlıq edir: bu simptom xroniki qulaq xəstəliyinin xəbərçisi ola bilər və vaxtında müalicə olunmazsa, geridönməz fəsadlara yol aça bilər.

Ölkə.Az-ın məlumatına görə, həkimlər bildirirlər ki, qulaq axıntısı çox vaxt xroniki otit – yəni orta qulağın uzunmüddətli iltihabından xəbər verir. İlk baxışdan zərərsiz görünən bu axıntılar tədricən qulağın daxili quruluşuna – o cümlədən eşitmə sümüklərinə və qığırdaq toxumasına ziyan vurur.

Bəzi hallarda xəstələr illərlə qulağından axıntı gəldiyini deyir, amma müalicə olunmayıblar. Nəticədə isə eşitmə sistemi ciddi zədələnir. Hətta elə hallar olub ki, qulağın içindəki strukturlar tamamilə dağılıb və pasiyent yalnız cərrahi implantla eşitmə qabiliyyətini qismən bərpa edə bilər.

Əməliyyatsız mümkün deyil
Gecikmiş hallarda pasiyentlərin həm qulaq pərdəsi, həm də eşitmə sümükləri sıradan çıxır. Bu zaman ossikuloplastika (eşitmə sümüklərinin bərpası) və ya qulaq implantı yerləşdirilməsi zəruri olur. Estetik zədələnmə varsa, əlavə olaraq qığırdaq rekonstruksiyası da aparılır.

Qeyd edək ki, bu cür əməliyyatlar həm baha, həm də risklidir. Əgər iltihab beyinə və sinirlərə yayılarsa, həyati təhlükə də yarana bilər.

Həkimə nə zaman müraciət etməli?
Aşağıdakı əlamətlər sizdə varsa, gecikmədən LOR həkiminə müraciət edin:

Qulaqdan axıntı (çirk, irin, bəzən qan qarışıq)

Pis qoxu

Qulaqda basqı və ya ağrı

Eşitmədə zəifləmə

Təkrar edən başgicəllənmələr və ya balans problemi

Həkimlər xatırladır ki, qulaq bədənimizin ən həssas orqanlarından biridir və sakit, ağrısız axıntılar belə təhlükəli ola bilər.

Telegramda izləyin