Mütəxəssislər hər gün artıq yeməyin qarşısını almaq üçün sadə üsullar təqdim edirlər

Düzgün qidalanma vərdişləri və bir neçə sadə texnika artıq yeməyin qarşısını almağa, sağlam çəkini qorumağa və xroniki xəstəliklərin yaranma riskini azaltmağa kömək edə bilər.

Sonxeber.az milli.az-a istinadən xəbər verir ki, "Live Strong" saytının yazdığına görə, bu üsulları gündəlik həyatınıza daxil etmək faydalı olar.

Yemək zamanı telefondan istifadə etməyin

Əgər diqqətiniz sosial şəbəkədə paylaşım və ya mesajlara yönəlirsə, beyniniz toxluq hissini daha zəif hiss edir. Nəticədə, ehtiyacınızdan artıq yeyə bilərsiniz.

Yeməyi diqqətlə çeynəməmək və dadını çıxarmamaq porsiyadan alınan məmnunluğu azaldır, bu zaman beyin toxluq hissinə "çatmaq" üçün daha çox yemək tələb edə bilər.

Həmçinin, sosial şəbəkələrdəki parlaq yemək şəkilləri və reklamlar artıq yemisinizsə belə iştahanızı artıra bilər.

Əgər yemək zamanı nə qədər yediyinizi xatırlamırsınızsa, növbəti dəfə daha çox yemək ehtimalınız artır.

Bundan əlavə, bədən telefon ekranına baxmağı yeməklə əlaqələndirməyə başlaya bilər və siz ac olmadığınız halda sadəcə darıxdığınız üçün qəlyanaltı etməyə meylli ola bilərsiniz.

2021-ci ilin fevralında American Journal of Clinical Nutrition jurnalında yayımlanan bir araşdırmada, cihazlardan istifadənin toxluq hissinə necə təsir etdiyi yoxlanılıb. Araşdırmada 44 iştirakçı iki qrupa bölünüb. Bir qrup nahar zamanı telefonda oyun oynamağa icazə alıb.

Hər iki qrup naharda doqquz növ duzlu yemək yeyib və onlardan toxluq hissini qiymətləndirmələri və dərhal sonra nə yediklərini xatırlamaları istənib. 30 dəqiqə sonra isə peçenye dadına baxmaq üçün test edilib.

Nəticədə məlum olub ki, diqqətsiz olan qrup nahardan sonra özlərini daha az tox hiss edib və peçenyelərdən daha çox yeyib. Onlar naharda hansı yeməkləri yediklərini də daha az dəqiqliklə xatırlayıblar.

Fasilələr verin

Növbəti dəfə süfrə arxasına keçəndə özünüzə bir çağırış edin, hər tikə arasında fasilə verin və çəngəli yerə qoyun. Sakit və yavaş yemək qida miqdarının azalmasına səbəb ola bilər.

Yeməyi daha yavaş yemək toxluq hormonlarına təsir göstərərək daha tez doyma hissi yarada bilər. Bu, həm də ağızla qidanın təması müddətinin və intensivliyinin artması ilə bağlıdır. Sürətli yemək zamanı bu təmas müddəti qısa olur və nəticədə daha çox yeyilir.

Yeməkdən əvvəl su için

Bədən üçün kifayət qədər su vacibdir və bu, çəkiyə nəzarətdə də rol oynaya bilər.

Əsas yeməklərdən 30 dəqiqə əvvəl təxminən iki stəkan su içmək 12 həftə ərzində orta səviyyədə çəki itkisinə səbəb ola bilər.

Əgər adi su içməkdə çətinlik çəkirsinizsə, dadını artırmaq üçün içinə təzə meyvə, dilimlənmiş xiyar və ya ədviyyat əlavə edə bilərsiniz. Bu, nə şəkər, nə də kalori artırmadan dadı dəyişəcək.

Artıq yeməyə səbəb olan digər səhvlər:

Yemək böyük boşqabda təqdim olunduqda daha çox yeyirsiniz

Kiçik qaşıqla yemək yemək tempini yavaşladır

Yeməklə qab arasında rəng fərqini azaldın (məsələn, karnabahar, kartof püresi və ya sıyığı ağ boşqabda təqdim edin) rəng kontrastı nə qədər çox olsa, bir o qədər çox yeyəcəksiniz

Aşağı və enli stəkandan deyil, hündür və dar stəkandan istifadə edin.

Telegramda izləyin