Hansı meyvələri birlikdə yemək olmaz? - Diyetoloqlardan XƏBƏRDARLIQ

Nar və bananın birlikdə qəbulu həzm sistemi üçün təhlükəli hesab olunur, hətta bəzi hallarda bu birləşmə bağırsaq keçməzliyinə səbəb olaraq insan həyatı üçün risk yarada bilər.

Oxu.Az xəbər verir ki, bu barədə Macarıstanın "Origo" nəşri diyetoloqların rəyinə istinadən məlumat yayıb.

Qeyd olunur ki, nar liflə zəngindir və çətin həzm olunur, bananın tərkibində isə yüksək miqdarda pektin maddəsi var.

"Pektin nar dənələrinin bağırsaqlarda şişməsinə səbəb olur. Bu zaman toxumlar kütlə halında yığılır və həmin kütlənin hərəkəti çətinləşir. Nəticədə bu kütlə quruyaraq bağırsaq traktını tıxaya bilər", - deyə materialda bildirilir.

Məqalə müəllifinin sözlərinə görə, narla bananın birgə qəbulu xüsusilə azyaşlı uşaqlar və yaşlı insanlar üçün təhlükəlidir. Çünki onlar çox vaxt kifayət qədər su qəbul etmirlər ki, bu da həzmi ləngidir.

Bundan əlavə, oxşar təsir göstərə biləcək başqa birləşmələr də var. Məsələn, alma, müsli, çia toxumu, liflə zəngin armud və ya narı tərkibində yüksək pektin olan heyva, qarağat, gavalı, böyürtkən, qarğıdalı və ərik kimi meyvə və giləmeyvələrlə eyni vaxtda yemək məsləhət görülmür.

Telegramda izləyin