Beynin qocalmasının qarşısını necə ala bilərik?

Müasir dövrdə beyin əvvəlki nəsillərlə müqayisədə daha sürətlə qocalır. Artıq təkcə yaşlılarda deyil, gənc insanlarda da yaddaş zəifliyi, diqqət dağınıqlığı, fikri cəmləyə bilməmək, enerjisizlik, öyrənmə çətinliyi və gün ərzində yuxululuq kimi hallar müşahidə olunur. Bu əlamətlər beynin erkən qocalmasının ilkin göstəriciləri hesab edilir.

Mövzu ilə bağlı Sonxeber.az-ın suallarını nevroloq Röyanə Quluzadə cavablandırdı.

Bəs, beyin niyə müasir dövrdə daha tez qocalır?

Röyanə Quluzadə: Bunun əsas səbəbləri müasir həyat tərzi ilə bağlıdır. Davamlı səs-küy və stress, həddindən artıq informasiya axını, telefon və sosial şəbəkələrdən uzunmüddətli istifadə, televiziya asılılığı, həmçinin qeyri-sağlam və süni qidalar beynin normal fəaliyyətini zəiflədir və onun tez yorulmasına səbəb olur.

Beynin gec qocalması üçün nə etməliyik?

Röyanə Quluzadə: Beynin sağlam qalması üçün bir neçə sadə, lakin təsirli qaydaya əməl etmək kifayətdir. Bu məqsədlə 5 qızıl qaydanı diqqətinizə çatdırırıq:

1. Yuxu rejiminə əməl edin

Axşam saat 22:00-dan gec olmayaraq yatmağa çalışın və gündə ən azı 8-9 saat keyfiyyətli yuxu alın. Yuxu beynin bərpası və yaddaşın möhkəmlənməsi üçün vacibdir.

2. Stressi azaldın və ekran vaxtını məhdudlaşdırın

Telefon və televizordan istifadənizi gündə maksimum 1 saatla məhdudlaşdırın. Hər gün açıq havada vaxt keçirin, gəzin, təbiətlə ünsiyyətdə olun. Gözləriniz yalnız mavi ekrana deyil, yaşıllığa da baxsın.

3. Sağlam qidalanın

Gündəlik qida rasionunuza qoz, badam, tərəvəz və meyvələr əlavə edin. Xüsusilə qış aylarında ət məhsullarını azaldaraq balıq və dəniz məhsullarına üstünlük verin. Bu qidalar beyin hüceyrələrinin qidalanmasına müsbət təsir göstərir.

4. Zehni aktiv saxlayın

Hər gün kitab oxuyun, yeni dil və ya yeni bacarıq öyrənməyə çalışın. Beyninizi daima məşğul edin və onun tənbəlləşməsinə imkan verməyin.

5. Sosial əlaqələri gücləndirin

Özünüzü cəmiyyətdən təcrid etməyin. Dostlarınız və qohumlarınızla vaxt keçirin, ünsiyyətdə olun, sağlam və müsbət münasibətlər qurun. Sosial aktivlik beyin sağlamlığı üçün ən güclü stimullardan biridir.

Telegramda izləyin