Ermənilərin tarixi alban irsinə sahib çıxmaq cəhdləri çoxdan başlayan prosesdir - ŞƏRH

"Tarixi alban irsinin dünyada məhz Azərbaycanın irsi kimi tanınmasının və tanıdılmasının müstəsna əhəmiyyəti var. Bunun əhəmiyyəti təkcə milli, etnik, mədəni və dini tariximizin bütövlüyünün bərpa edilməsi ilə məhdudlaşmır. Alban irsinin Azərbaycan-Türk irsi kimi tanıdılmasının böyük strateji əhəmiyyəti var. Bu, xüsusilə Ermənistanın ideoloji, siyasi, diplomatik və tarixi müstəvidə apardığı siyasətə tutarlı cavabdır".

Bunu Sonxeber.az-a açıqlamasında siyasi şərhçi Aydın Quliyev bildirib.

O, bildirib ki, ermənilərin tarixi alban irsinə sahib çıxmaq cəhdləri çoxdan başlayan prosesdir:

"Onlar alban irsinə sahib çıxmaqla özlərini bu bölgənin ən qədim xalqı və əraziyə ən çox haqqı çatan tərəf kimi təqdim etməyə çalışırlar. Bunun arxasında iki əsas niyyət dayanır. Birincisi, erməniləri bu bölgənin ən qədim və ərazilər üzərində daha çox haqqı olan xalq kimi təqdim etməkdir. İkincisi isə erməniləri dünyada xristian irsinin ilk rəsmi sahibi kimi göstərməkdir. Qədim Albaniyada xristianlığın həvarilər səviyyəsində yayılması xristian dininin ilk rəsmi yayılma ocaqlarından biri kimi təqdim olunur. Albaniyada xristianlığın yayılması və qəbulunun Bizansda xristianlığın yayılmasından daha qədim tarixə getdiyi bildirilir. III əsrin əvvəllərində Albaniyada xristianlığın yayılmağa başladığı, İsa həvarilərinin və apostollarının davamçıları səviyyəsində xristianlığın təbliğ olunduğu və ilk xristian məbədlərinin yaradılmağa başladığı qeyd edilir".

Ekspert bildirib ki, ermənilər isə xristianlığı dünyada rəsmi din kimi qəbul edən ilk xalqın məhz ermənilər olduğunu hesab edirlər:

"Bu yanaşma tamamilə yanlışdır. Bununla onlar özlərini hətta Bizansdan əvvəl xristian dinini qəbul etmiş xalq kimi təqdim etməyə çalışırlar. Alban irsinə sahib çıxmaq cəhdinin arxasında dayanan məqsədlərdən biri də özlərini dünyada ən qədim xristian xalqı kimi təqdim etməkdir. Buna görə də ermənilərin hansı niyyətlərdə və hansı hədəflərə doğru hərəkət etdiyini bir kənara qoyaraq, ilk növbədə öz dini, siyasi, milli və etnik tariximizin bütövlüyünün bərpasına diqqət yetirməliyik. Tariximizin milli, dini və etnik bütövlüyünü qorumaq baxımından xristian-alban irsinə tam şəkildə sahib çıxmağa mənəvi haqqımız var. Bizim üçün strateji və həyati əhəmiyyət daşıyan məsələlərdən biri alban-xristian dini irsinə öz doğma tarixi irsimiz kimi sahib çıxmaqdır".

Röyalə Xəyal

Telegramda izləyin