Polşa ABŞ-yə hərbi baza üçün dörd şəhər təklif edib

Polşa ABŞ-nin ölkə ərazisində daimi hərbi baza yerləşdirməsi üçün dörd mümkün şəhərin adını Vaşinqtona təqdim edib.
Bizimyol.info xəbər verir ki, bu barədə Polşa Müdafiə Nazirliyinin nümayəndəsi, general Dariuş Lukovski "Rzeczpospolita" qəzetinə müsahibəsində bildirib.

Onun sözlərinə görə, baza üçün Vrotslav, Poznan, Bıdqoş və Şetsin şəhərləri nəzərdən keçirilir. Yekun qərarı ABŞ Prezidenti Donald Tramp verəcək.

Lukovski deyib ki, tikinti işlərinə bazanın yerləşəcəyi ərazi, qoşun növü və hərbçilərin sayı müəyyənləşdirildikdən sonra başlanacaq.

Generalın məlumatına görə, daimi hərbi bazanın tikintisi ən azı üç il çəkəcək və təxminən 750 milyon dollara başa gələcək. Bundan əlavə, ABŞ hərbçilərinin ailə üzvlərinin və mülki personalın yerləşdirilməsi üçün infrastrukturun yaradılmasına bir neçə milyard zlotı vəsait tələb olunacaq.

Lukovskinin hesablamalarına əsasən, bazada 5 min ABŞ hərbçisi yerləşdirilərsə, onların ailə üzvləri və mülki əməkdaşlarla birlikdə Polşaya gələn amerikalıların ümumi sayı təxminən 15 min nəfərə çata bilər.

Polşanın keçmiş müdafiə naziri Mariuş Blaşak oktyabrın 28-də ölkənin belə bir bazanın tikintisini maliyyələşdirmək üçün vəsaitinin olmadığını bildirib. Onun sözlərinə görə, nə cari ilin büdcəsində, nə də gələn ilin büdcə layihəsində bu məqsəd üçün maliyyə nəzərdə tutulub.

Telegramda izləyin