Himalay dağlarında yarım əsr sirr olaraq qalan qeyri-adi həşərat aşkarlandı

Himalay dağlarında əvvəllər yalnız tropik ərazilərdə yaşadığı düşünülən milçək növü müəyyən edilib. Təxminən 50 il əvvəl sürfələri aşkarlanan, lakin hansı növə aid olduğu bilinməyən həşəratın sirri yalnız 2025-ci ildə yetkin fərdlərin tapılmasından sonra açılıb.

Qaynarinfo xəbər verir ki, bu barədə "Daily Galaxy" nəşri məlumat yayıb.

"Vermitigris tsangyanggyatso" adlandırılan yeni növün müəyyənləşdirilməsi ilə bağlı araşdırmanın tarixi 1978-ci ilə gedib çıxır. Həmin vaxt alimlər Himalay bölgəsində qurdabənzər milçək sürfələri aşkarlayıblar. Lakin yetkin fərdlər olmadığı üçün onların hansı növə aid olduğunu dəqiqləşdirmək mümkün olmayıb.

2025-ci ildə Yadun bölgəsində araşdırma aparan alimlər nəhayət həmin həşəratın yetkin nümunələrini əldə ediblər. Təhlillər nəticəsində onun elm üçün yeni növ olduğu müəyyənləşdirilib.

Öz ölçüləri və görünüşü ilə fərqlənir

Yeni müəyyən edilən həşərat bir çox yaxın qohumlarından daha böyükdür. Yetkin fərdlərin uzunluğu 19,5 millimetrə, qanadlarının açıqlığı isə təxminən 16 millimetrə çatır.

Onun qarın hissəsinin rəngi sarımtıl-qəhvəyidən qırmızımtıl-qəhvəyiyə qədər dəyişir. Bu xüsusiyyət onu qohum növlərdən fərqləndirir. Həmçinin həşəratın ağız aparatının bir hissəsi olan xortumu qeyri-adi dərəcədə qısadır. Alimlər onun yetkinlik dövründə ümumiyyətlə qidalanmaya biləcəyini ehtimal edirlər.

Sürfələri qumda tələ quraraq ov edir

Bu həşəratın ən maraqlı xüsusiyyətlərindən biri ovlanma üsuludur. Sürfələr ovlarını təqib etmək əvəzinə, qumda və ya yumşaq torpaqda qıf formasında çuxurlar qazaraq tələ hazırlayırlar. Kiçik canlılar həmin çuxurlara düşdükdə sürfələrin ovuna çevrilirlər.

Himalay növünün sürfələrinin uzunluğu 20-28 millimetrə çatır. Bu isə onların yetkin fərdlərdən daha böyük olması deməkdir. Sürfələrin bədənində 5-7 tikanla təchiz edilmiş yarımdairəvi, ətli çıxıntı da mövcuddur.

Tədqiqatçılar bildirirlər ki, həşəratlar əsasən xırda çay qumuna üstünlük versələr də, müxtəlif səthlərdə tələ qura bilirlər. Onların fərqli torpaq və qum növlərinə necə uyğunlaşdığı isə hələ tam aydınlaşdırılmayıb.

Alimlərin fikrincə, bu kəşf həşəratların yayılma arealı və yüksək dağlıq ərazilərin biomüxtəlifliyi ilə bağlı bilikləri genişləndirir. Eyni zamanda, uzun illər əvvəl tapılmış, lakin düzgün müəyyənləşdirilməmiş növlərin yenidən araşdırılmasının əhəmiyyətini göstərir.

Telegramda izləyin