Yazın gəlişi ilə uşaqları hədəf alan TƏHLÜKƏLİ XƏSTƏLİKLƏR: Onları necə qoruyaq?

Yaz fəslinin gəlişi ilə təbiət canlandığı kimi bəzi xəstəliklər də oyanır. Bu xəstəliklər daha çox azyaşlı uşaqlarda müşahidə edilir və gözlənilməyən məqamda orqanizmi taqətdən salır.

Bəs görəsən, yazın gəlişi ilə hansı xəstəliklər, viruslar oyanıb? Bu xəstəliklər arasında təhlükəli olanı varmı? Uşaqları necə qorumalıyıq?

Pediatr, infeksionist Aytən Ziyadova mövzu ilə bağlı Oxu.Az-a danışıb.

O qeyd edib ki, havanın qəfil dəyişməsi, temperaturun enməsi, yüksəlməsi, yağış və külək, həmçinin çiçək tozları bu dövrdə daha çox infeksion xəstəliklərin yayılmasına səbəb olur:

"Xəstəliklərin artmaması üçün vaxtında tədbirlər görmək çox vacibdir. İnfeksionist kimi deyə bilərəm ki, son günlər uşaqlarda yüksək qızdırma ilə müşahidə edilən xəstəliklər arasında "Respiratory Syncytial Virus"a (RSV) sıx rastlanır. Bu virus uşaqlarda daha çox yayılıb və aktualdır. RSV azyaşlı uşaqlarda və körpələrdə tənəffüs yollarını zədələyərək ciddi problemlərə səbəb olur.

Bu virusun uşaqlarda müşahidə edilən əlamətləri bunlardır:

- Quru və ya bəlğəmsiz öskürək;

- Burun axması və burun tutulması - Bu, uşağın nəfəs almasını çətinləşdirə bilər;

- Yüksək hərarət;

- Digər tənəffüs yolu infeksiyalarında olduğu kimi, bu virusda asqırma da müşahidə olunur;

- Nəfəs almaqda çətinlik - xüsusilə uşaq yatarkən və ya aktiv olduqda nəzərə çarpır;

- "Stridor" (səsli nəfəs alma - red.) - Tənəffüs yollarının daralması səsli nəfəs almağa səbəb olur;

- Qarın ağrısı və qusma;

- Yuxusuzluq - uşağın tənəffüs çətinliyi səbəbindən yuxusuzluq ortaya çıxır.

RSV uşaqlarda bronxiolit (kiçik bronxların iltihabı - red.) və ya pnevmoniya kimi daha ciddi problemlərə səbəb ola bilər. Əgər uşağınızda bu əlamətlərdən biri və ya bir neçəsi müşahidə olunarsa, xüsusilə təngnəfəslik və yüksək hərarət, təcili olaraq həkimə müraciət etmək lazımdır".

A.Ziyadova vurğulayıb ki, xəstəlik ərəfəsində uşaqların tənəffüs yollarının müdafiəsini gücləndirmək, istirahət etmələrini təmin etmək, bol maye qəbul edilməsi və temperaturu nəzarətdə saxlamaq vacib addımlardır.

O əlavə edib ki, allergik astma da yazda aktivləşən xəstəliklərdən biridir:

"Tənəffüs yollarının daralması ilə müşayiət olunur və öskürək, təngnəfəslik, xırıltı kimi əlamətlərə səbəb olur. Allergik astma ilə mübarizədə müalicəni kəsməmək və allergenlərdən qorunmaq çox önəmlidir.

Yuxarı tənəffüs yolları xəstəlikləri yazın gəlişi ilə artmağa başlayır. Tonzillit, faringit, laringit, sinüzit kimi xəstəliklər qızdırma, boğaz ağrısı, öskürək, asqırma, səs xırıltısı və qulaq ağrısı kimi əlamətlərlə özünü büruzə verə bilər. Bu xəstəliklərdən qorunmaq üçün uyğun paltar seçimi, balanslı qidalanma, kifayət qədər su içmək və yuxusuz qalmamaq kimi sadə, amma təsirli tədbirlər görülməlidir".

İnfeksionist qeyd edib ki, allergik rinit (saman qızdırması - red.) yaz aylarında, xüsusilə çiçək tozlarının yayılması ilə artan xəstəliklərdən biridir:

"Burun axması, burun tutulması, asqırma, gözlərdə qaşınma və sulanma, öskürək və qoxu almada çətinlik kimi əlamətlər allergik rinitin göstərdiyi simptomlarıdır. Bu xəstəlik allergik astma ilə birlikdə müşahidə oluna bilər, ona görə də müntəzəm müalicə və allergenlərdən qorunmaq çox önəmlidir".

"Reflüks xəstəliyi isə yazda və ya ilin digər dövrlərində müşahidə olunur. Bu xəstəlik mədənin turşusunun yemək borusuna geri axması ilə bağlı olan bir problemdir. Reflüks mədədə yanma hissi, boğazda qıcıqlanma, öskürək, bəzən isə nəfəs darlığına səbəb ola bilər. Həmçinin yaz aylarında, bəzi yeməklər və stres sözügedən xəstəliyin əlamətlərini gücləndirə bilər", - deyə həkim fikrini yekunlaşdırıb.

Telegramda izləyin