Estetik əməliyyat etmək istəyənlərə qiymətlərlə bağlı XƏBƏRDARLIQ

Xəbər verdiyimiz kimi Azərbaycan Respublikası Səhiyyə Nazirliyinin müvafiq əmri ilə "Cərrahiyyə profili üzrə digər peşə ixtisas sahibləri tərəfindən ali ixtisas tibb təhsilinin tədris proqramlarına uyğun olaraq icrasına icazə verilən plastik cərrahiyyə sahəsinə aid əməliyyatların Siyahısı" təsdiq edilib.

Qeyd edək ki, ölkə ərazisində praktik tibb fəaliyyəti ilə məşğul olan plastik cərrahların peşə fəaliyyətinin qanuni əsaslarının kompleks şəkildə yoxlanılması məqsədilə Azərbaycan Respublikasının Səhiyyə Nazirliyi, Azərbaycan Respublikasının Baş Prokurorluğu, Azərbaycan Respublikasının Daxili İşlər Nazirliyi və Azərbaycan Respublikasının Elm və Təhsil Nazirliyinin səlahiyyətli nümayəndələrindən ibarət Xüsusi Təftiş Komissiyası yaradılıb.

Xüsusi Təftiş Komissiyasının müvafiq qərarları ilə sənədlərinin əsaslılığı təsdiq olunmuş və 42 həkimin Azərbaycan Respublikasının ərazisində plastik cərrahiyyə ixtisası üzrə praktik tibb fəaliyyətinə icazə verilib.

Halbuki, xüsusi icazə üçün 100-ə yaxın müraciət olub. Cəmi 42 həkimə xüsusi icazənin verilməsi bu sahədə keyfiyyətin yüksələcəyinə bir ümid yaradır.

Amma həkimlərin azalmasının xidmətdəki qiymətlərə də yeni dinamika verəcəyi də qeyd olunur.

Məsələ ilə bağlı Tibb elmləri doktoru Adil Qeybullanın fikirlərini öyrəndik. Bizim.Media-ya açıqlamasında bu qərarın işin keyfiyyətinə təsir edəcəyini düşünmədiyini deyib:

"Sadəcə, sözügedən prodsedur bundan sonra qanunla, hüququn imkan verdiyi formada tənzimlənəcək. Əslində bizdə akkredasiya sistemi yoxdur. Ona görə də belə bir icazəli sistem yaradıldı. Bu da müəyyən bir süzgəcdir. Yəni kim gəldi plastik cərrahiyyə ilə məşğul olmayacaq. Söhbət bundan gedir ki, bu işlə məşğul olanların əllərində hüquqi əsas olsun".

Bəs, həkim azlığı xidmətin qiymətlərini qaldırmayacaq ki?

"Bu daha çox xəstələrin rəyindən və istəyindən asılıdır. O ki, qaldı saya... Onu deyə bilərəm ki, gələcəkdə həm ilk dəfə xüsusi icazə kağızı almayan, həm də yeni həkimlər müracət edib, sertifikat ala biləcəklər", - deyə müsahibimiz əlavə edib.

Telegramda izləyin