Ventilyator ürək tutmasına səbəb olur - XƏBƏRDARLIQ

İsti havada ventilyatordan istifadə ürək tutmasına səbəb ola bilər.

Ölkə.Az xəbər verir ki, bu barədə Avstraliyanın Sidney Universitetində araşdırma aparılıb.
Araşdırma çərçivəsində 20 nəfər könüllü iştirakçı 39 dərəcə Selsi temperatur və 49% rütubətdə qurulmuş iqlim kamerasında 3 saatlıq dörd fərqli təcrübə keçib.

Sınaqların ikisində iştirakçılar təcrübədən əvvəl 24 saat ərzində tövsiyə olunan miqdarda su içib. Təcrübə zamanı iştirakçılara su içməyə də icazə verilib.

Digər iki sınaqda isə iştirakçılar susuzlaşdırılıb və su içmək, eləcə də yüksək sulu qidalardan istifadə etmək qadağan edilib.

Araşdırma "Emergency Medicine" jurnalında dərc olunub.

Tapıntılar göstərib ki, ventilyatorlar susuzlaşdırma hallarında ürəyin gərginliyini artırır və potensial olaraq infarkt keçirməyə səbəb olur.

Vurğulanıb ki, ventilyatorlar tərləməni 60% artırır və buna görə də susuzluq hallarında orqanizmə zərər verə bilər.

Doktor Konor Qraham ventilyatorla bağlı insanlara xəbərdarlıq edib:

"Həddindən artıq istidən dünyasını dəyişən bir çox insanın evlərində kondisioner yoxdur, lakin ventilyator var. Ventilyatorlar 39-40 dərəcə Selsiyə qədər olan temperaturda bədən istiliyini və ürəyin gərginliyini azalda bilər, lakin daha yuxarı temperaturda söndürülməlidir, çünki bədən həddindən artıq qızır və tərləmə ilə özünü lazımi dərəcədə soyuda bilmir".

Mütəxəssislər xəbərdarlıq edir ki, sağlam insanlar üçün bu hədd 39 dərəcə Selsi olduğu halda, 65 yaşdan yuxarılar üçün 38 dərəcədən yuxarı temperaturda ventilyator istifadəsi risklidir.

Yaşlı insanlar, xüsusən sidik nəzarəti üçün antikolinerjik dərmanlar qəbul edənlər, hətta 37 dərəcədən yuxarı temperaturda belə ehtiyatlı olmalıdırlar.

İsti havadan qorunmaq üçün bir neçə üsul tövsiyə edirlər. Bunlara günəşli otaqlarda pərdələrin və pəncərələrin bağlı saxlanması, istilik vurmasının əlamətlərini öyrənmək və bu əlamətlər baş verdikdə necə müdaxilə etmək daxildir.

İstilik vurmasının simptomlarına həddindən artıq tərləmə, solğun və nəmli dəri, yorğunluq, zəiflik, başgicəllənmə, ürəkbulanma, əzələ və baş ağrısıdır.

Telegramda izləyin