Yunan yoqurtunun faydaları. Necə hazırlanır?

Son illərdə qida sənayesində ən çox diqqət çəkən məhsullardan biri Yunan yoqurtudur.

Qaynarinfo-nun verdiyi xəbərə görə, bir çox insan onu adi qatıqla səhv salsa da, əslində ciddi fərqlər mövcuddur.

Yunan yoqurtu nədir?

Yunan yoqurtu — qatığın xüsusi üsulla süzülməsi nəticəsində hazırlanır. Onun tərkibindəki zərdab (südün sulu hissəsi) çıxarıldığı üçün qatılığı artır, krem kimi daha qalın və yumşaq olur.

Adi qatıqdan fərqi

Qatı quruluşu: Adi qatıq daha duru olur, Yunan yoqurtu isə süzülmüş olduğu üçün xeyli qalındır.

Zülal miqdarı: Yunan yoqurtunda zülal 2 dəfə artıqdır.

Yağ nisbəti: Çox vaxt azyağlı hazırlanır, amma adi qatıqda yağ nisbəti südün növündən asılıdır.

Dad və tekstura: Yunan yoqurtu daha yumşaq və kremkimidir, adi qatıq isə turşməzə dadı ilə seçilir.

Dünyada niyə məşhurdur?

Yunan yoqurtu xüsusilə ABŞ və Avropada sağlam qidalanma trendinin simvoluna çevrilib. İdmançılar və pəhriz saxlayanlar onu yüksək zülal, az karbohidrat və doyumluluq hissi yaratdığına görə gündəlik rasiona əlavə edirlər. Eyni zamanda desert, sous və salatlarda da geniş istifadə olunur.

Faydaları

Zülal baxımından zəngindir – əzələ inkişafına kömək edir.

Laktoza miqdarı daha azdır – həzm sistemi üçün daha rahatdır.

Kalsium və probiotiklərlə zəngindir – sümük sağlamlığına və immunitetə müsbət təsir göstərir.

Çəkiyə nəzarətə kömək edir – uzun müddət toxluq yaradır.

Hazırlanma qaydası

Südü qızdırın – Südü təxminən 80-85°C-ə qədər qızdırın (qaynama həddinə yaxın). Sonra ocağı söndürün.

Soyudun – Südü 40-45°C-ə qədər soyumağa buraxın. (Barmağı batıranda isti, amma yandırmayan halda olmalıdır.)

Maya qatın – 2 qaşıq qatığı südün içinə əlavə edib yaxşıca qarışdırın.

Mayalandırın – Qabı örtüb isti yerdə 6–8 saat saxlayın. Bu müddətdə süd qatığa çevriləcək.

Süzün – Hazır qatığı təmiz cunanın içinə töküb üstünü bağlayın və dərin qaba asılı vəziyyətdə qoyun. 3–4 saat saxlayın ki, zərdab süzülüb axsın.

Soyudun və istifadə edin – Süzülmüş qatıq artıq Yunan yoqurtudur. Qatı, krem kimi olur. Soyuducuda saxlamaq məsləhətdir.

İstəyə görə üzərinə meyvə, bal və ya qoz-fındıq əlavə edilərək yeyilə bilər.

Telegramda izləyin