Zeytun yağı və limon suyu qarışımı arıqlamağa kömək edir? - DİYETOLOQLAR AÇIQLADI

Son illərdə sosial mediada "səhər acqarına möcüzəvi qarışıqlar" trendə çevrilib. Xüsusilə zeytun yağı və limon suyunun birlikdə içilməsi həm arıqlama, həm də "orqanizmi təmizləmə" vasitəsi kimi təqdim olunur.

Bəs görəsən bu qarışım doğurdanmı faydalıdır?

Sorğu ünvanladığımız diyetoloqlar məsələ ilə bağlı Sonxeber.az -a danışıblar:

"Zeytun yağı özü çox dəyərli bir məhsuldur. Tərkibində sağlam yağ turşuları var və ürək-damar sağlamlığına müsbət təsiri elmi olaraq təsdiqlənib. Limon suyu isə C vitamini baxımından zəngindir və immun sistemini dəstəkləyə bilər. Yəni hər iki məhsul ayrı-ayrılıqda faydalıdır.

Amma bu iki komponentin birlikdə, xüsusilə acqarına qəbulunun "arıqladıcı effekt" yaratdığına dair ciddi elmi sübut yoxdur. Arıqlama prosesi yalnız bir qarışım içməklə deyil, ümumi kalori balansı, fiziki aktivlik və metabolik faktorlarla bağlıdır. Hətta burada vacib bir detal var: zeytun yağı yüksək kalorilidir. Səhər acqarına 1-2 xörək qaşığı içmək əlavə kalori deməkdir və bu, bəzi insanlarda əksinə çəki artımına səbəb ola bilər.

Digər tərəfdən, bu qarışım bəzi hallarda həzm sisteminə təsir göstərə bilər. Məsələn: mədə turşuluğu yüksək olan insanlarda limon suyu narahatlıq yarada bilər v' ya öd kisəsi problemi olanlarda yağ qəbulu spazm və ağrı verə bilər.

"Detoks" məsələsinə gəlincə isə, orqanizmin özünün çox güclü təmizləmə sistemi var: qaraciyər və böyrəklər. Heç bir içki bu sistemi möcüzəvi şəkildə əvəz etmir.

Zeytun yağı və limon suyu qarışımı zərərsiz ola bilər, amma onu "arıqladan möcüzəvi vasitə" kimi qəbul etmək doğru deyil. Əgər məqsəd çəki azaltmaqdırsa, daha effektiv və sağlam yanaşma balanslı qidalanma, porsiya nəzarəti və aktiv həyat tərzidir".

Telegramda izləyin