Çiçəkləmə mövsümündə gözləriniz risk altındadır - Həkim səbəbləri açıqladı

"Çiçəkləmə dövründə göz xəstəlikləri daha da şiddətlənir".

Oxu.Az xəbər verir ki, bu barədə oftalmoloq Aygül Otxozoriya "İzvestiya" nəşrinə müsahibəsində bildirib.

Mütəxəssisin fikrincə, yaz aylarında gözlərdə iltihabi xəstəliklərin yaranma ehtimalı artır. Bu fəsildə hava şəraiti və mövsümi dəyişikliklər gözlərin qıcıqlanmasına və iltihablanmasına zəmin yaradır.

"Tozlanma dövrünün ən aktiv vaxtında açıq havada olarkən tozcuqlar birbaşa gözün səthinə təmas edir. Bu isə qaşınma, qızarma və sulanmanı şiddətləndirə bilər. Bu səbəbdən imkan daxilində pəncərələri bağlı saxlamaq və küçəyə çıxarkən eynəkdən istifadə etmək vacibdir", - deyə həkim vurğulayıb.

Oftalmoloq bildirib ki, yaz aylarında ən çox müşahidə edilən problemlərdən biri allergik konyunktivitdir. Sözügedən xəstəlik qaşınma, qızartı, göz qapaqlarında şişkinlik və intensiv sulanma ilə xarakterizə olunur. Eyni zamanda, burun axıntısı və asqırma da müşahidə oluna bilər.

Həkim əlavə edib ki, bahar aylarında viral konyunktivitə yoluxma halları da artır. Çox vaxt allergiya ilə səhv salınan bu xəstəlik tamamilə fərqli müalicə üsulu tələb edir. Qorunmaq üçün əllərin təmizliyinə diqqət yetirmək və fərdi gigiyena vasitələrindən istifadə etmək tövsiyə olunur.

İltihabi prosesin təkcə selikli qişanı deyil, həmçinin buynuz qişanı da zədələdiyi keratokonyunktivit kimi təhlükəli hallara da diqqət çəkilib. Bu xəstəlik kəskin işığa həssaslıq (fotofobiya) və ağrılar yarada, vaxtında müdaxilə olunmadıqda isə ciddi fəsadlara səbəb ola bilər.

"Xəstəliyin daha ağır formalarında göz toxumalarının zədələnməsi, çapıqlaşma, xroniki quruluq və bakterial infeksiyaların yaranması ehtimalı var. Allergik reaksiyaların güclü fotofobiya və ya ağrı ilə müşayiət olunması ağırlaşma təhlükəsi daşıdığından, mütləq şəkildə dərhal oftalmoloq müayinəsi tələb olunur", - deyə ekspert xəbərdarlıq edib.

Bununla yanaşı, yaz mövsümündə ultrabənövşəyi şüaların buynuz qişanı zədələməsi nəticəsində yaranan fotokeratit riski də yüksəlir. Mütəxəssis qeyd edib ki, günəş şüaları altında uzun müddət qorunmadan qalmaq gözlərdə qıcıqlanma yaradır və işığa qarşı həssaslığı artırır.

Sözügedən fəsildə quru göz sindromu da kəskinləşir. Külək, tozcuqlar, havanın temperaturunun dəyişməsi və quraqlıq bu problemin yaranmasına səbəb olur, gözdə yad cisim hissi və yanğı yaradır.

Oftalmoloq ultrabənövşəyi şüalardan qoruyan eynəklərdən istifadə etməyi, tozlanmanın aktiv dövründə pəncərələri bağlamağı və otağın havasını nəmləndirməyi tövsiyə edir.

Telegramda izləyin