Dietoloqlardan sadə tövsiyə: "Rəngli qidalanma" iltihabı azaltmağa kömək edir

Mütəxəssislər bildirirlər ki, mürəkkəb pəhrizlərə və ya çətin tapılan qidalara ehtiyac olmadan da sağlam qidalanmaq mümkündür. Dietoloqlar iltihabı nəzarətdə saxlamağın ən asan yollarından birinin hər yeməyə rəng qatmaq olduğunu deyir.

Qaynarinfo-nun "Real Simple" nəşrinə istinadən məlumatına görə, konsepsiya olduqca sadədir: boşqab nə qədər rəngarəngdirsə, orqanizm bir o qədər çox faydalı qida maddələri qəbul edir.

Parlaq rəngli bitki mənşəli qidalar - çuğundur, qaragilə və yarpaqlı göyərtilər fitonutrientlərlə zəngindir. Bu maddələr iltihabı azaltmağa, həmçinin ürək xəstəlikləri, həzm problemləri və digər xroniki xəstəliklərdən qorunmağa kömək edir. Lakin mütəxəssislər qeyd edir ki, insanların əksəriyyəti kifayət qədər meyvə və tərəvəz istehlak etmir.

Elmi tədqiqatlar bitki əsaslı qidalanmanın əhəmiyyətini təsdiqləyir. 100 mindən çox insanın iştirak etdiyi araşdırma göstərib ki, gündə təxminən 5 porsiya meyvə və tərəvəz istehlakı ölüm riskini 13% azalda bilər. Buna baxmayaraq, praktikada insanların gündəlik qida rasionu bu səviyyədən xeyli aşağıdır.

Dietoloqların tövsiyəsi sadədir, hər yeməyə və ya qəlyanaltıya rəngli bir qida əlavə etmək kifayətdir.

Məsələn, qatığın üzərinə giləmeyvələr əlavə etmək, makaronlara pomidor, noxud və digər tərəvəzlər qatmaq, sendviçlərə göyərti və təzə tərəvəzlər əlavə etmək

Mütəxəssislər vurğulayır ki, bu yanaşma məhdudiyyətlər qoymur, əksinə mövcud qidaların dəyərini artırır.

Dietoloq Dana Angelo White bildirir ki, bu strategiya mərhələli şəkildə tətbiq oluna bilər: "Əgər hazırda boşqabınızda rəng yoxdursa, bir yeməkdən başlayın və tədricən artırın. Bu, həm vizual, həm də qidalanma baxımından dərhal müsbət təsir göstərir."

Mütəxəssislər əlavə edirlər ki, bütün qidaların təzə olması şərt deyil. Dondurulmuş, qurudulmuş və konservləşdirilmiş məhsullar da eyni dərəcədə faydalıdır. Əsas məsələ bu qidaların davamlı şəkildə rasiona daxil edilməsidir.

Az miqdarda belə olsa, bu qidaların müntəzəm istifadəsi ümumi sağlamlığa müsbət təsir göstərir.

Nəticə olaraq bildirilir ki, iltihabı azaltmaq sərt pəhrizlərdən deyil, gündəlik sadə vərdişlərdən asılıdır. "Rəngli qidalanma" isə bu istiqamətdə ən asan və effektiv üsullardan biri hesab olunur.

Telegramda izləyin