İltihabı zəncəfildən daha təsirli şəkildə aradan qaldıran 8 qida

İltihab təkcə zədə və ya ağrıdan sonra yaranan şişkinlik deyil. Bədəndə illərlə səssiz şəkildə davam edən xroniki iltihabın ürək-damar xəstəlikləri, diabet və artrit kimi problemlərin inkişafı ilə əlaqəli olduğu elmi araşdırmalarda göstərilir. Buna görə "iltihabı azaltmaq üçün nə yemək lazımdır" sualı artıq təkcə diyetologiyanın deyil, profilaktik təbabətin də əsas mövzularından birinə çevrilib.

Qaynarinfo xəbər verir ki, bu barədə "Verywell Health" yazır.

Zəncəfil uzun müddətdir təbii "iltihabəleyhinə vasitə" kimi tanınır və bu reputasiya əsassız deyil. O, tərkibindəki gingerol və efir yağları sayəsində iltihabi reaksiyaların zəifləməsinə kömək edir.

Bununla belə, yeni tədqiqatlar göstərir ki, zəncəfil yeganə və hətta ən güclü məhsul deyil.

1. Sarıkök

Birinci yeri sarıkök tutur. Bildirilir ki, onun aktiv maddəsi kurkumin eyni zamanda bir neçə iltihab markerini azaldır: C-reaktiv protein, interleykin-6 və şiş nekrozu faktoru alfa. "Cytokine" jurnalında dərc olunan randomizə olunmuş nəzarətli tədqiqatların meta-analizinə görə, kurkumin əksər qida məhsullarından daha geniş iltihab siqnal yollarına təsir edir və bu da onu lider edir.

2. Zeytun yağı

"Extra virgin" zeytun yağı tərkibində oleokantal adlı maddə daşıyır. Bu maddənin ibuprofenə bənzər şəkildə iltihab prosesini başladan fermentləri blokladığı göstərilir. "EVOO" təxminən 30 bioaktiv birləşmə ehtiva edir və hüceyrələri qoruyaraq immun sisteminin həddindən artıq reaksiyasını azaldır. Xüsusilə daha zərərli yağların əvəzinə istifadə edildikdə daha effektiv olur.

3. Pomidor

Gözlənilməz nəticə olaraq siyahıya pomidor daxil edilib. Onlar likopen və flavonoidlər, kumarinlər kimi ondan çox bioaktiv maddə ehtiva edir. "Nutrients" jurnalında yayımlanan araşdırmaya əsasən, bu birləşmələr Nrf2 və NF-κB siqnal yolları vasitəsilə iltihabi fermentlərin səviyyəsini azaldır.

4. Yağlı balıq

Qızılbalıq, skumbriya, tuna və sardina omeqa-3 yağ turşuları (EPA və DHA) ilə zəngindir. Bu yağ turşuları təkcə iltihabın qarşısını almır, həm də onun aradan qaldırılmasına kömək edir, sitokinlərin və prostaqlandinlərin səviyyəsini azaldır.

5. Giləmeyvələr

Qaragilə, çiyələk, moruq və böyürtkən antosianlarla zəngindir. Bu antioksidantlar eyni zamanda CRP, IL-6 və TNF-α kimi üç əsas iltihab markerini azaldır. Bu baxımdan giləmeyvələr ən kompleks iltihabəleyhinə məhsullardan sayılır.

6. Yarpaqlı göyərti

Yarpaqlı tərəvəzlər C və E vitaminləri, eləcə də karotinoidlərlə zəngindir. Onlar sərbəst radikalları neytrallaşdırır və oksidativ stresi azaldır. Bəzi növlər TNF-α kimi iltihab siqnal molekullarının istehsalını da azaldır. Bu tip qidalarla zəngin pəhriz daha aşağı CRP səviyyəsi ilə əlaqələndirilir.

7. Qoz-fındıq

Xüsusilə qozlar omeqa-3, E vitamini, antioksidantlar və polifenollarla zəngindir. Tədqiqatların meta-analizi göstərir ki, müntəzəm istifadə damar iltihabında rol oynayan ICAM-1 molekulunun səviyyəsini azaldır. Effekt yalnız uzunmüddətli və davamlı istifadədə müşahidə olunur.

8. Lobya

Siyahını tamamlayan lobya lif, antioksidant və bitki mənşəli zülalla zəngindir. Lif bağırsaq mikrobiotasını dəstəkləyərək iltihabı azaldır, polifenollar isə sərbəst radikalların təsirini zəiflədir. Araşdırmalar lobya ilə zəngin qidalanmanın CRP və interleykin-6 səviyyəsinin aşağı olması ilə əlaqəli olduğunu göstərir.

Telegramda izləyin